(1910) Una vez yera un rei
-Voy cuntavos un cuento,
neños del alma,
pa ver si se vos quita
esa galbana.
¿Queréis que vos lo cuente
cares del cielo?
-Sí, sí; - dixeron todos,
cuéntelo, güelo.
-Pos güeno; teney xuicio,
y tai atentos
y cuidáu que dalguno
m’estripe’l cuento.
Yera un rey de les Indies
muy poderosu,
guapín ya gayasperu
ya bondadosu,
que’n jamás de la vida
dioy per casase
per que nunca se-i-diera
pe’les rapaces.
Peru como ‘nel mundo
cambien les coses…
(Atiza’l fueu, Rosario,
que fierva’l pote).
Llegoy, tamién, la hora
al güen monarca
d’enamorase’l probe
d’una rapaza,
que yera una princesa
(…)
d’unos menutos
(Tavos quietos, pixinos,
no arméis barullo).
Por siñor, como anantes
diba diciendo,
quiso la prencipesa
uir aquello
y metéuse pa dentro
d’una chalana
au taba’l gaiteru
co la su gaita
tocando les mudances
de la muñeira,
como nunca gaiteru
tocón na tierra.
Mientres tanto, los homes
de les chalanes
remaben pa su Reino
por altos mares,
llevando nuna barca
á la princesa
sin que esta rapaza
se diese cuenta…
-A, mi güelo, esi cuento
yá lu sé yo,
que me lu contó Xuana
nun esfoyón.
-Pos si tu ya lu sabes.
ya non lu cuento…
¡Nunca falta un babieca
pa estripar cuentos!